بو گُل کیمی دوغرانان جنازه

بو گُل کیمی دوغرانان جنازه، نسلیمدن ازل فدادی زینب

اوز جدّی شهنشه حجازه، مرآت بدن نمادی زینب

اولسِیدی مشیّت اقتضاسی، اون اوچ حجّت الهی

اولماقلیقا خلق مقتداسی، آئینه ی قدرت الهی

بی شبهه اولوردی حق رضاسی، اکبر اولا آیت الهی

چون خَلقده خُلقده سراپا، آئینه ی مصطفادی زینب

اوّلده عوالم شهادت، گیچمیشدی مشیّت خدادن

یازمشدی اگرچه کلک قدرت، امّا نگرا نیدیم بِدادن

اولدوم باجی مطمئن او ساعت، قان آخدی شبیه مصطفادن

وار اول خبرین نه انتهاسی، بوقان اونا مبتدادی زینب

انجامه یتیشدی امتحانیم، تا روحیمون عکسی قانه باتدی

آتدان یخولاندا نوجوانیم، ارواح آرا باشیمی اوجاتدی

امّا داخی قالمادی توانیم، اکبر اُلومی منی قوجاتدی

عالمده جوان اوغول آتانین، دائیم الینه عصادی زینب

ویر آل عبایه بو نویدی، برپا عرصات محشر اولدی

اوغلوم دگی بو آتام علیدی، چون باشدان او شاهه مظهر اولدی

لیلانون اورکده کی امیدی، یاس اولدی شهید اکبر اولدی

مجنون ایلین اونی بو قانلی، عضویله دولی عبادی زینب

لیلانی وفاده هاجریله، بیر بُلسه بیری دوشر خطایه

قربان خلیل داوریله، چوخدور بو جواندا فرق و پایه

ذی حقدی علیّ اکبریله، فخر ایلسه کربلا منایه

بیت و حرم و منایه علّت، خلقتده بو کربلادی زینب

بو ذبح عظیمدور فَدَینا، قرآندا اولوب بونا کنایه

اوز قانین ایدوب مداد حمرا، بو آیت قدرت خدایه

جسمینده قلجلاریله اعدا، قرآنی یازوبلار آیه آیه

امّا داغیلوب ورق ورقدن، هر آهی جُدا جُدادی زینب

بو مصحف مُنزل اولسا تفسیر، دنیا بویی مایه ی عزادور

هر زخم سنان و تیر و شمشیر، بیر آیه ی محکمه نمادور

اولسا متشابهاتی تعبیر، مصداق کواکب سمادور

قان آغلاسا ماسوا بو غمده، تا واردی جهان بجادی زینب

باخسان بُله سن نجه چو لاله، اعضاسین عبایه دولدوروبلار

گَلمز او که حیطه ی خیاله، گُل جسمینه اوخ قلج ووروبلار

شام اهلی بو ماه رو غزاله، دام ستم و بلا قوروبلار

بُلماقلاری بو حرم غزالین، آهوی خطا، خطادی زینب

هر فرش جفا بو گون سالندی، دوزدوم دیمه اولدی طاقتیم طاق

امّا داخی طاقتیم آلندی، گُل تک بالامی گورنده اوراق

صبریم داشا شیشه تک چالندی، آهیم شرریله دولدی آفاق

قلبیم کیمی بو لطیف پیکر، باشدان اَیاقا یارادی زینب

میداندا اسفلی حالتیله، اوغلوم او زمان که جان ویروردی

قلبیمده اولان جراحتیله، گوز جامیم عُذاره قان ویروردی

سعد اوغلی منه شمادتیله، اوغلانلارینی نشان ویروردی

گوز یاشیمی قان ایدن گوزیمده، بو طعنه و بو جفادی زینب

گُلزار وفاده بو مَلَک رو، بیر گُلدی دچار اولوبدی خاره

تیغ ستمیله قوم بدخو، گُل جسمین ایدوبله پاره پاره

مَخیَمده سکینه یا علی گو، اولموش بو سولان گُله هزاره

بوندان صورا گُلستاندا بلبل، گُل گورسه ایشی نوادی زینب

ویر باجیسینا خبر بو حالی، قارداشی مرامینه چاتوبدی

محبوبیله درک ایدوب وصالی، گوزدن هامی عالمی آتوبدی

بو حالدن ایله لیک حالی، یورقوندی او یاتماسون یاتوبدی

صبر ایتسون اگرچه شیون ایتسه، قارداشی اُلن سزادی زینب

سعدیّ زمان بالام حسینی، صادقدی همیشه خدمتینده

رخساره آخار سرشک عینی، یوخ ریب و ریاسی نیّتینده

پوزقوندی خیالی چوخدی دِینی، ویرّم، قالا قویمارام چتینده

اوندان یاراشان خطا و لغزش، بیزدن کرم و عطادی زینب

بقلم آقاسیدرضا حسینی ره

باتشکرفراوان ازجناب حمیدرضاباراندوزی بابت ارسال این شعر